వాజ్‌పేయి వారసత్వం చిరస్మరణీయం

భారతరత్న అటల్ బిహారీ వాజ్‌పేయి ఒక రాజనీతిజ్ఞుడు, దార్శనికుడు, విశిష్ట నాయకుడు, నిస్వార్థ సామాజిక సేవకుడు, శక్తివంతమైన వక్త, కవి, సాహిత్యవేత్త, పాత్రికేయుడు, బహుముఖ ప్రజ్ఞాశాలి. నేషనల్ డెమోక్రటిక్ అలయన్స్ నేతృత్వంలో ఏర్పడిన ప్రభుత్వానికి మొదటి ప్రధానమంత్రి. 1999-2004 మధ్య మొదటి కాంగ్రెసేతర పూర్తికాల ప్రభుత్వానికి విజయవంతంగా నాయకత్వం వహించారు. వాక్చాతుర్యం, వివేకం, ప్రజాదరణ కారణంగా మూడుసార్లు దేశానికి ప్రధానమంత్రి అయ్యారు. ఆయన వారసత్వాన్ని రాబోయే తరాలు ఎప్పుడూ ఆదరిస్తూనే ఉంటాయి.

అటల్ బిహారీ వాజ్‌పేయి ఒక ఆకర్షణీయమైన, ఆలోచనాత్మకమైన నాయకుడు. 1942లో ‘క్విట్ ఇండియా’ ఉద్యమం సమయంలో 24 రోజులు జైలులో గడపడంతో వారి రాజకీయ జీవితం ప్రారంభమైంది. అటల్ బిహారీ వాజ్‌పేయి బిజెపి వ్యవస్థాపక సభ్యులు, తొలి అధ్యక్షులు. ఆయన భారత ప్రజాస్వామ్యం, జాతీయ ఐక్యత, సామాజిక సామరసతకు తన జీవితాన్ని అంకితం చేశారు. ‘రాష్ట్రధర్మ’, ‘పాంచజన్య’, ‘వీర్‌ అర్జున్‌’ వంటి అనేక జాతీయవాద పత్రికలకు సంపాదకునిగా ఉంటూనే జాతీయవాద భావజాలాన్ని ప్రజల్లో వ్యాప్తి చేశారు. 1975లో మాజీ ప్రధాని ఇందిరా గాంధీ విధించిన ఎమర్జెన్సీ సమయంలో అరెస్టయ్యారు. 1977లో కేంద్ర విదేశాంగ మంత్రిగా ఐక్యరాజ్యసమితిలో హిందీలో ప్రసంగించిన మొదటి వ్యక్తిగా ఘనత వహించారు. ప్రపంచ వేదికపై హిందీకి గుర్తింపు తీసుకురావడంలో ఆయన చేసిన కృషి చిరస్మరణీయం.

అటల్ బిహారీ వాజ్‌పేయి భారత రాజకీయాలలో ఆదర్శప్రాయుడు. అతని ఆలోచనలు, విధానాలు, పనితీరుతో 1992లో పద్మవిభూషణ్, 1994లో భారతదేశపు ‘ఉత్తమ పార్లమెంటేరియన్’ మరియు 2015లో భారతదేశ అత్యున్నత పురస్కారం “భారతరత్న” అందుకున్నారు. అటల్ బిహారీ వాజ్‌పేయి 24 పార్టీల కూటమితో 81 మంది మంత్రులు ఉన్న ప్రభుత్వాన్ని ఏర్పాటు చేశారు. ఇంత పెద్ద మరియు విభిన్న కూటమి ఉన్నప్పటికీ, ప్రభుత్వంలో ఉన్న ఏ పార్టీ కూడా ఎలాంటి వివాదాన్ని లేవనెత్తలేదు. ఇది అతని సమర్థ నాయకత్వానికి అద్భుతమైన ఉదాహరణ. 1999లో అటల్ బిహారీ వాజ్‌పేయి ప్రభుత్వం లోక్‌సభలో కేవలం ఒక్క ఓటు తేడాతో పడిపోయినప్పుడు, ఆయన “హార్ నహీ మానుంగా, రార్ నహీ తనుంగా” అంటూ కవిత చదివారు. ఈ కవిత అతని విశ్వాసం, సంకల్పం, సానుకూల దృక్పథాన్ని ప్రదర్శించింది. తన ప్రత్యర్థులకు సమాన గౌరవం ఇవ్వడం అతని ధర్మబద్ధమైన ప్రజాస్వామ్య విలువలకు ఉదాహరణ. వాజ్‌పేయిని భారత రాజకీయాల్లో ‘భీష్మ పితామహుడు’గా మాజీ ప్రధాని మన్మోహన్ సింగ్ అభివర్ణించారు.

జాతి నిర్మాణానికి అంకితం

ఒకవైపు ప్రతిపక్షాలు అణ్వాయుధాల పేరుతో ప్రజలను భయభ్రాంతులకు గురిచేస్తుంటే మరోవైపు అటల్ బిహారీ వాజ్‌పేయి ప్రభుత్వం 1998లో పోఖ్రాన్‌లో అణు పరీక్షలను విజయవంతంగా నిర్వహించి భారతదేశాన్ని అణుశక్తిగా మార్చింది. పాకిస్తాన్‌తో 1999 కార్గిల్ యుద్ధం సమయంలో అటల్ బిహారీ వాజ్‌పేయి దేశానికి నాయకత్వం వహించారు. ఈ యుద్ధంలో పాకిస్థాన్ సైన్యాన్ని మట్టికరిపించి భారత సైన్యం విజయం సాధించింది. అటల్ జీ భారతదేశంలోని మెట్రో నగరాలను కలుపుతూ స్వర్ణ చతుర్భుజి ప్రాజెక్టుకు పునాది వేశారు. ప్రధానమంత్రి గ్రామ్ సడక్ యోజన ద్వారా గ్రామీణ ప్రాంతాలను పట్టణ కేంద్రాలకు అనుసంధానించి గ్రామీణాభివృద్ధిని ప్రోత్సహించారు. అటల్ జీ ప్రభుత్వం అన్నపూర్ణ అన్న యోజనను ప్రారంభించింది, ఇది సమాజంలోని పేద వర్గాలకు ఆహార భద్రతను కల్పించి, ఆకలి లేని భారతదేశాన్ని సృష్టించింది. అటల్ బిహారీ వాజ్‌పేయి 10 అక్టోబర్ 1999న గిరిజన వ్యవహారాల మంత్రిత్వ శాఖను ఏర్పాటు చేశారు. తద్వారా గిరిజన సమాజం అభివృద్ధికి అంకితభావంతో, ప్రణాళికాబద్ధంగా కృషి కొనసాగుతోంది.

అటల్ బిహారీ వాజ్‌పేయి ప్రారంభించిన కిసాన్ క్రెడిట్ కార్డ్ పథకం రైతులకు సంస్థాగత రుణాలను అందించింది, తమ భూమిని తాకట్టు పెట్టకుండా రైతులను కాపాడింది. చక్కెర పరిశ్రమ (1998), పాడి పరిశ్రమ (2002), బీటీ-పత్తి వినియోగాన్ని అనుమతించడం ద్వారా వ్యవసాయ అభివృద్ధిలో విప్లవాత్మక చర్యలు తీసుకున్నారు. అటల్ జీ ఛత్తీస్‌గఢ్, ఉత్తరాఖండ్, జార్ఖండ్‌ రాష్ట్రాలను శాంతియుతంగా ఏర్పాటు చేశారు. తద్వారా కేంద్రీకృత పాలన, ప్రాంతీయ అభివృద్ధికి అవకాశం ఏర్పడింది.

రాజ్యాంగ నిర్మాత బాబాసాహెబ్ డాక్టర్ భీమ్‌రావ్ అంబేద్కర్ “విద్య సింహం పాలతో సమానం, ఎవరు తాగినా గర్జిస్తారు” అని స్పష్టం చేసినా, ప్రతిపక్ష ప్రభుత్వాలు ఉచిత విద్యపై శ్రద్ధ చూపలేదు. అటల్ బిహారీ వాజ్‌పేయి 2001లో “సర్వశిక్షా అభియాన్”ను ప్రారంభించి 6-14 సంవత్సరాల మధ్య వయస్సు ఉన్న పిల్లలందరికీ ఉచిత విద్య అందించారు. అటల్ జీ కృషి ఫలితంగానే నేడు దేశం పోలియో వంటి అంటువ్యాధుల నుండి విముక్తి పొందింది. వారి నాయకత్వంలో 2001-2002లో పోలియోకు వ్యతిరేక ప్రచారాన్ని విజయవంతంగా చేపట్టారు. ఢిల్లీ మెట్రో రెడ్ లైన్‌ను అటల్ బిహారీ వాజ్‌పేయి ప్రారంభించారు. ఇది భారతదేశంలో అగ్రగామి పట్టణ రవాణా వ్యవస్థకు నాంది పలికింది. ఇది దేశంలో మౌలిక సదుపాయాల ఆధునికీకరణకు పునాదులు వేసింది. నేడు భారత చంద్రయాన్ మిషన్ అంతరిక్ష సాంకేతికతలో సరికొత్త శిఖరాలను అధిరోహించందంటే నాడు చంద్రయాన్-1 ప్రకటనతో అటల్ బిహారీ వాజ్‌పేయి పునాది వేయడమే కారణం. 2003లో అటల్ జీ చైనా పర్యటన సందర్భంగా, సిక్కింను భారత్‌లో అంతర్భాగంగా చైనా తొలిసారి అధికారికంగా అంగీకరించింది.

అటల్ జీ విజన్‌ గా వికసిత్ భారత్ 

అటల్ బిహారీ వాజ్‌పేయి గారి అంత్యోదయ లక్ష్యాన్ని మోదీ ప్రభుత్వం నెరవేరుస్తోంది. మోదీ ప్రభుత్వం గరీబ్ కల్యాణ్ అన్న యోజన ద్వారా 81 కోట్ల మందికి ఉచిత రేషన్, ప్రధానమంత్రి ఆవాస్ యోజన ద్వారా 3.56 కోట్ల కుటుంబాలకు పక్కా ఇళ్లు, స్వచ్ఛ భారత్ ద్వారా 12.35 కోట్ల మరుగుదొడ్లు, ఉజ్వల యోజన ద్వారా 10.33 కోట్ల మంది మహిళలకు గ్యాస్ సిలిండర్లు, జల్ జీవన్ మిషన్ ద్వారా 12 కోట్ల ఇళ్లకు నల్లా నీటిని అందించారు. ఆయుష్మాన్ భారత్ యోజన 36 కోట్ల మందికి ఉచిత చికిత్సను అందిస్తోంది. 14,320 జన్ ఔషధి కేంద్రాలు దేశంలోని ప్రతి వ్యక్తికి సరసమైన ధరలకు మందులను అందజేస్తున్నాయి. 54 కోట్ల జన్‌ధన్ ఖాతాలు, 44 కోట్ల మందికి ముద్రా రుణాలు, ప్రధానమంత్రి స్వనిధి యోజన ద్వారా 94 లక్షల మంది వీధి వ్యాపారులకు రుణాలు అందించి వారిని “ఆత్మనిర్భర్”గా మార్చారు. వారిని ఉపాధి కోరే వారి నుండి ఉపాధి కల్పించే వారిగా మార్చారు.

“కనిష్ట ప్రభుత్వం, గరిష్ట పాలన” అనే మంత్రాన్ని అనుసరిస్తూ నగదు బదిలీ ద్వారా ప్రభుత్వ ప్రయోజనాలన్నీ నేరుగా ప్రజల ఖాతాల్లోకి వెళ్తున్నాయి, తద్వారా అవినీతి రహిత భారతదేశానికి మార్గం సుగమమైంది. అటల్ జీ రైతు సంక్షేమ లక్ష్యాన్ని మరింత ముందుకు తీసుకెళ్తూ ప్రధానమంత్రి కిసాన్ సమ్మాన్ నిధి ద్వారా రైతులకు సంవత్సరానికి రూ.6000 అందిస్తున్నారు. దేశంలో తొలిసారి రైతుల సంక్షేమం, శ్రేయస్సు కోసం సహకార మంత్రిత్వ శాఖ ఏర్పాటైంది. భారతదేశ సమగ్రత, సార్వభౌమత్వాన్ని దెబ్బతీసేందుకు ప్రయత్నించిన వారికి అటల్ జీ నాయకత్వంలో మన భద్రత బలగాలు తగిన సమాధానం ఇచ్చాయి. నేటి బిజెపి ప్రభుత్వం సర్జికల్ స్ట్రైక్స్, వైమానిక దాడుల ద్వారా పాకిస్తాన్ ప్రాయోజిత ఉగ్రవాదాన్ని దెబ్బతీసింది, పాకిస్తాన్ మరచిపోయిన పాఠాన్ని మళ్లీ గుర్తు చేసింది.

‘మహిళలకు సమాన హక్కులు లభించే వరకు మన ప్రజాస్వామ్యం అసంపూర్ణం’ అని అటల్ జీ అన్నారు. ప్రధాన మంత్రి నరేంద్ర మోదీ నాయకత్వంలో నారీ శక్తి వందన్ చట్టం ద్వారా మహిళలకు పార్లమెంట్, రాష్ట్ర అసెంబ్లీలలో 33% రిజర్వేషన్ లభించింది. అటల్ బిహారీ వాజ్‌పేయి భారతదేశ సంస్కృతికి అంతర్జాతీయ గుర్తింపు ఇచ్చారు. ప్రధాన మంత్రి నరేంద్ర మోదీ వ్యాక్సిన్ మైత్రి అభియాన్ ద్వారా 98 దేశాలకు 200 మిలియన్ డోసుల కోవిడ్ వ్యాక్సిన్‌ను సరఫరా చేసి “విశ్వమిత్ర”గా భారతదేశ స్థానాన్ని బలోపేతం చేశారు. మోదీ ప్రభుత్వం ఆత్మనిర్భర్ భారత్ అభియాన్‌ను ప్రారంభించింది. దీని కింద భారతదేశాన్ని స్వావలంబనగా మార్చడానికి స్వదేశీ ఉత్పత్తిని ప్రోత్సహిస్తోంది. ఈ ప్రచారం భారతదేశం విదేశీ వస్తువులపై ఆధారపడటం తగ్గించింది, స్థానిక ఆర్థిక వ్యవస్థను పెంచింది. అటల్ జీ ప్రభుత్వం ప్రారంభించిన అటల్ టన్నెల్, బోగీబీల్ వంతెన, కోసి రైలు వంతెన, పారాదీప్ రిఫైనరీలను మోదీ ప్రభుత్వం పూర్తి చేసింది. భారతదేశ మౌలిక సదుపాయాల ప్రయాణాన్ని కొత్త శిఖరాలకు తీసుకువెళ్లింది.