భారత్ అభివృద్ధిని ప్రతిబింబించే బిజెపి ప్రస్థానం

భారత రాజకీయ యవనికపై తనదైన ముద్ర వేస్తూ, ప్రపంచంలోనే అతిపెద్ద రాజకీయ శక్తిగా ఎదిగిన భారతీయ జనతా పార్టీ  ప్రతి ఏటా ఏప్రిల్ 6న తన ఆవిర్భావ దినోత్సవాన్ని జరుపుకొంటుంది . 1980లో జనసంఘ్ వారసత్వంతో ఒక సామాన్య రాజకీయ పార్టీగా ప్రస్థానాన్ని ప్రారంభించిన బిజెపి, నేడు భారత రాజకీయాలను శాసించే స్థాయికి చేరుకుంది. దేశ పాలన, ఆర్థిక వ్యవస్థను మెరుగుపరచడంలో,  అంతర్జాతీయ వేదికలపై భారత ప్రతిష్టను ఇనుమడింపజేయడంలో పార్టీ కీలక పాత్ర పోషించింది. ఈ దినోత్సవం కేవలం పార్టీ కార్యకర్తల వేడుక మాత్రమే కాదు, బిజెపి సైద్ధాంతిక ప్రస్థానం,  సంస్థాగత బలం, ముఖ్యంగా ప్రధాని నరేంద్ర మోదీ నాయకత్వంలో సాగుతున్న ‘నవ భారత’ నిర్మాణాన్ని విశ్లేషించుకునే సందర్భం.

సంస్థాగత బలం, ప్రజలతో అనుసంధానం

గత నాలుగు దశాబ్దాలలో బిజెపి కార్యకర్తల పార్టీ నుంచి ఒక సామూహిక ప్రజా ఉద్యమంగా రూపాంతరం చెందింది. క్రమశిక్షణతో కూడిన సంస్థాగత నిర్మాణం, జాతీయవాదం, అభివృద్ధి పునాదులుగా కలిగిన స్పష్టమైన సైద్ధాంతిక దృక్పథం పార్టీ విజయ రహస్యాలుగా నిలుస్తున్నాయి. బూత్ స్థాయి వరకు కార్యకర్తలను సమన్వయం చేయడం, విభిన్న వర్గాలను సమైక్యం చేయడంలో బిజెపి ప్రదర్శిస్తున్న చొరవ ఎన్నికల విజయాల్లో కీలక భూమిక పోషిస్తోంది. నేడు కేంద్రంతో పాటు పలు రాష్ట్రాల్లో అధికారంలో ఉండటం పార్టీ పట్ల ప్రజల్లో ఉన్న ఆదరణకు నిదర్శనం.

మోదీ యుగం: ఆర్థిక సంస్కరణలు, సంక్షేమం

2014లో నరేంద్ర మోదీ ప్రధానిగా బాధ్యతలు చేపట్టిన తర్వాత దేశం ప్రగతి పథంలో వేగంగా దూసుకుపోతోంది.  ఆర్థిక సంస్కరణలు, సంక్షేమ పథకాలు, మౌలిక సదుపాయాల కల్పనపై ప్రభుత్వం ప్రత్యేక దృష్టి సారించింది. సుమారు 7.4 శాతం జీడీపీ వృద్ధి రేటుతో, ప్రపంచంలో వేగంగా ఎదుగుతున్న అగ్రగామి ఆర్థిక వ్యవస్థలలో ఒకటిగా భారత్ నిలిచింది. ఇది అంతర్జాతీయ పెట్టుబడులను ఆకర్షించడమే కాకుండా ప్రపంచ వేదికపై భారత్ గౌరవాన్ని పెంచింది.

సమ్మిళిత వృద్ధి – సంక్షేమ పథకాలు

మోదీ ప్రభుత్వ పాలనలో ‘అంత్యోదయ’ (చిట్టచివరి వ్యక్తికి కూడా ఫలాలు అందడం) భావనకు అత్యంత ప్రాధాన్యం లభిస్తోంది.

• ఆహార భద్రత: సుమారు 81 కోట్ల మందికి ఉచిత రేషన్ పంపిణీ.
• పారిశుధ్యం: స్వచ్ఛ భారత్ మిషన్ కింద 11.81 కోట్ల మరుగుదొడ్ల నిర్మాణం. 
• ODF+ గ్రామాలు: 5.65 లక్షలకు పైగా.
• ఆవాస్ యోజనం: 5 కోట్ల వరకు పేదలకు పక్కా ఇళ్ల నిర్మాణం. 
• ఉజ్జ్వల యోజన : 10.33 కోట్ల ఉచిత ఎల్పీజీ కనెక్షన్లు
• బ్యాంకు ఖాతాలు: 55.31 కోట్ల మందికి జీరో బ్యాలెన్స్ ఖాతాలు.
• ఆయుష్మాన్ భారత్: దాదాపు 10 కోట్ల ఉచిత చికిత్సలు.
• ప్రధానమంత్రి జీవన్ జ్యోతి బీమా యోజన: సుమారు 23 కోట్ల మందికి జీవిత బీమా.
• ముద్రా రుణాలు: 52 కోట్లకు పైగా పూచీకత్తు లేని రుణాలు.

ఇలాంటి పథకాలెన్నో సామాన్యుల జీవన ప్రమాణాలను మెరుగుపరచడంలో అద్భుత ఫలితాలను ఇచ్చాయి.

మౌలిక సదుపాయాల విప్లవం

రవాణా, కమ్యూనికేషన్ రంగాల్లో బిజెపి ప్రభుత్వం భారీ మార్పులు తెచ్చింది. రోడ్లు, రైల్వేలు, విమానాశ్రయాలు, డిజిటల్ నెట్‌వర్క్‌ల కోసం లక్షల కోట్ల రూపాయల పెట్టుబడులు పెట్టింది. మారుమూల గ్రామాలను ప్రధాన ఆర్థిక కేంద్రాలతో అనుసంధానించడం ద్వారా ఆర్థిక కార్యకలాపాలు పుంజుకున్నాయి. ఇది పారిశ్రామిక వృద్ధికి, ఉపాధి అవకాశాల కల్పనకు మార్గం సుగమం చేసింది.

ఆవిష్కరణలు,  అంతర్జాతీయ ఖ్యాతి

‘మేక్ ఇన్ ఇండియా’, ‘డిజిటల్ ఇండియా’, ‘స్టార్టప్ ఇండియా’ వంటి కార్యక్రమాలు దేశంలో ఆవిష్కరణలకు ఊపిరి పోశాయి. జీఎస్‌టీ  వంటి పన్ను సంస్కరణలు దేశ ఆర్థిక వ్యవస్థను సరళీకృతం చేశాయి. మరోవైపు, వ్యూహాత్మక దౌత్యం ద్వారా భారత్ అంతర్జాతీయ శక్తిగా  ఎదిగింది. రక్షణ రంగంలో స్వయంసమృద్ధి, అంతర్జాతీయ వేదికలపై కీలక పాత్ర పోషించడం ద్వారా దేశ భద్రత, ఆత్మగౌరవం బలపడ్డాయి.

చారిత్రక విజయాలు – భవిష్యత్ లక్ష్యం

ప్రధాని మోదీ నాయకత్వంలో బిజెపి వరుసగా మూడు సార్లు సార్వత్రిక ఎన్నికల్లో విజయం సాధించి చరిత్ర సృష్టించింది. కేవలం ఎన్నికల విజయాలకే పరిమితం కాకుండా, 2047 నాటికి భారతదేశాన్ని అభివృద్ధి చెందిన దేశంగా మార్చాలనే ‘వికసిత్ భారత్’ లక్ష్యంతో పార్టీ ముందుకు సాగుతోంది. స్థిరమైన విధానాలు, పక్కా ప్రణాళికలతో దేశాభివృద్ధికి కట్టుబడి ఉంది.  అయితే ఉపాధి కల్పన, ఆర్థిక అసమానతలను తొలగించడం వంటి సవాళ్లు ప్రభుత్వం ముందున్నాయి. వీటిని సమర్థంగా ఎదుర్కోవడం భవిష్యత్ వృద్ధికి అత్యవసరం.

ఏప్రిల్ 6, బిజెపి ప్రస్థానాన్ని గుర్తుచేసుకునే రోజు మాత్రమే కాదు; ఒక సామాన్య పార్టీగా మొదలై దేశ భవిష్యత్తును తీర్చిదిద్దే శక్తిగా ఎదిగిన వైనాన్ని ప్రతిబింబించే సందర్భం. అభివృద్ధి, సుపరిపాలనే లక్ష్యంగా బిజెపి సాగిస్తున్న ఈ ప్రయాణం నవ భారత నిర్మాణంలో కీలక ఘట్టంగా నిలుస్తుంది.