మోదీ 12 ఏళ్ల పాలనలో పెరిగిన భారత ప్రతిష్ట

గడిచిన 12 ఏళ్ల ప్రధాని నరేంద్ర మోదీ సుపరిపాలనలో భారతదేశం అంతర్జాతీయ వేదికలపై తిరుగులేని గౌరవాన్ని, శక్తివంతమైన గుర్తింపును సాధించిందని కేంద్ర రక్షణ శాఖ మంత్రి రాజ్‌నాథ్ సింగ్ కొనియాడారు. జూన్ 12న సికింద్రాబాద్‌లో నిర్వహించిన ‘మేధావుల సమ్మేళనం’లో ఆయన ముఖ్య అతిథిగా హాజరై ప్రసంగించారు. ”12 ఏళ్ల సుపరిపాలన – అభివృద్ధి – ప్రజా సంక్షేమం” అనే అంశంపై జరిగిన ఈ సదస్సులో ఆయన మాట్లాడుతూ.. దేశంలో, అంతర్జాతీయంగా భారతదేశం సాధించిన అపూర్వ ప్రగతిని వివరించారు. ఈ వేదికపై మేధావులను ఉద్దేశించి మాట్లాడటం తనకు ఎంతో సంతోషాన్ని ఇస్తోందని రక్షణ మంత్రి పేర్కొన్నారు. తన ప్రసంగం ప్రారంభంలో రాజ్‌నాథ్ సింగ్ భారతదేశ ఉక్కు మనిషి సర్దార్ వల్లభభాయ్ పటేల్ కు ఘన నివాళులు అర్పించారు. హైదరాబాద్‌ను భారతదేశంలో అంతర్భాగంగా మార్చి, దేశ ఐక్యతను, సమగ్రతను కాపాడటంలో పటేల్ చేసిన అసాధారణమైన కృషిని ఈ సందర్భంగా ఆయన స్మరించుకున్నారు.

ఈ మేధావుల సదస్సులో రాజ్‌నాథ్ సింగ్ మాట్లాడుతూ.. హైదరాబాద్‌కు రావడం ఎల్లప్పుడూ సంతోషాన్నిస్తుందని, ఇక్కడి భారీ జనసందోహం చూస్తుంటే దేశ ప్రజల ఆశీస్సులు భారతీయ జనతా పార్టీకే ఉన్నాయని స్పష్టమవుతోందని అన్నారు. ప్రధాని నరేంద్ర మోదీ ప్రజాస్వామ్యబద్ధంగా, ప్రజలచే ఎన్నికై, అత్యంత సుదీర్ఘకాలం దేశానికి సేవ చేసిన ప్రధానమంత్రిగా రికార్డు సృష్టించారని, ఇది సామాన్యమైన విజయం కాదని, ప్రజల అచంచల విశ్వాసానికి ప్రతీక అని కొనియాడారు. అంతర్జాతీయంగా అత్యంత ప్రజాదరణ పొందిన నాయకుడిగా మోదీ గుర్తింపు పొందారని పేర్కొంటూ, మోదీ నేతృత్వంలోని గడిచిన 12 సంవత్సరాల కాలం దేశ ప్రగతిలో, సంస్కరణల పరంగా చారిత్రాత్మకమైనవని, 2047 నాటికి భారతదేశం ఖచ్చితంగా ‘వికసిత భారత్’గా మారి తీరుతుందని ధీమా వ్యక్తం చేశారు.

విశ్వసనీయతే బిజెపి బలం‌‌

రాజకీయాల్లో నాయకుడికి లేదా పార్టీకి అతిపెద్ద పెట్టుబడి విశ్వసనీయత (క్రెడిబిలిటీ) అని, చెప్పేదానికి చేసేదానికి తేడా ఉన్నప్పుడు విశ్వసనీయత సంక్షోభం ఏర్పడుతుందని రాజ్‌నాథ్ సింగ్ అభిప్రాయపడ్డారు. కాంగ్రెస్ హయాంలో ఈ సంక్షోభం ఉండేదని, కానీ బిజెపి ఇచ్చిన ప్రతి మాటను నిలబెట్టుకుంటూ ప్రజల్లో నమ్మకాన్ని పెంచిందని చెప్పారు. పశ్చిమ బెంగాల్‌లో ప్రజల నమ్మకాన్ని వమ్ము చేసిన వారికి అక్కడి ప్రజలు బుద్ధి చెప్పారని, అక్కడ బిజెపి స్పష్టమైన మెజారిటీతో ప్రభుత్వం ఏర్పాటు చేయడంలో విజయవంతమైందని గుర్తుచేశారు. ఒక నమ్మకమైన నాయకుడికి ఉండాల్సిన నాలుగు గుణాలు—చిత్తశుద్ధి, నిజాయితీ, పని చేసే సామర్థ్యం, ఇచ్చిన హామీలను ఫలితాలుగా మార్చే నైపుణ్యం—ప్రధాని మోదీలో సంపూర్ణంగా ఉన్నాయని స్పష్టం చేశారు. మోదీ ప్రధాని కాగానే “నా ఖావూంగా, నా కిసీకో ఖానే దూంగా” అని స్పష్టం చేశారని, మంత్రి అయినా, సామాన్యుడైనా అవినీతిని సహించేది లేదని నిరూపించారని చెప్పారు. కాంగ్రెస్ పాలనలో 2G స్కామ్, కామన్వెల్త్ స్కామ్, ఆగస్టా వెస్ట్‌ల్యాండ్ హెలికాప్టర్ స్కామ్ వంటి లక్షల కోట్ల అవినీతి వల్ల దేశ ప్రతిష్ట మసకబారిందని, సైనికుల భద్రతను కూడా పణంగా పెట్టారని విమర్శించారు. తాము అధికారంలోకి వచ్చాక రక్షణ బడ్జెట్‌ను రూ.2.5 లక్షల కోట్ల నుండి దాదాపు రూ.8 లక్షల కోట్లకు పెంచామని, రక్షణ రంగానికి కేటాయించే ప్రతి పైసా అత్యంత పారదర్శకంగా, దేశ భద్రత కోసమే ఖర్చవుతోందని రక్షణ మంత్రిగా హామీ ఇచ్చారు.

బిజెపి వచ్చే ఎన్నికల కోసం కాకుండా, రాబోయే తరం భవిష్యత్తు కోసం ఆలోచిస్తుందని రాజ్‌నాథ్ సింగ్ అన్నారు. తాము ఇచ్చిన ప్రతి మాటను నిలబెట్టుకున్నామని పేర్కొంటూ, అయోధ్య గడ్డపైనే భవ్య రామమందిరాన్ని నిర్మిస్తామని చెప్పి చేసి చూపించామన్నారు. దేశంలోకి వచ్చే అక్రమ చొరబాటుదారులను సరిహద్దుల వెలుపలికి పంపుతామని చెప్పామని, బిజెపి అధికారంలో ఉన్న రాష్ట్రాల్లో ఆ ప్రక్రియ వేగంగా జరుగుతోందని, పశ్చిమ బెంగాల్‌లో కూడా చొరబాటుదారులను బయటకు పంపే పని వేగవంతమైందని తెలిపారు. ముస్లిం మహిళల జీవితాల్లో శాపంగా మారిన ట్రిపుల్ తలాక్ సామాజిక దురాచారాన్ని చట్టబద్ధంగా రద్దు చేశామని, వక్ఫ్ చట్టాల్లో అవసరమైన సంస్కరణలను విజయవంతంగా తీసుకువచ్చామని చెప్పారు. కొత్త పార్లమెంట్ భవనంలో చట్టసభల్లో మహిళలకు 33% రిజర్వేషన్ కల్పించే చారిత్రాత్మక బిల్లును తీసుకువచ్చామని, మహిళలకు పూర్తి భాగస్వామ్యం, హక్కులు దక్కే వరకు తాము విశ్రమించబోమని, ఇది మోదీ ప్రభుత్వ గ్యారెంటీ అని స్పష్టం చేశారు. దేశంలో సమయం, వృథా ఖర్చులను తగ్గించడానికి లోక్‌సభ, అసెంబ్లీ ఎన్నికలను ఒకేసారి నిర్వహించాలన్నదే (వన్ నేషన్ – వన్ ఎలక్షన్) మా ఆలోచన అని, అందరినీ విశ్వాసంలోకి తీసుకుని ఈ పనిని ఖచ్చితంగా చేసి తీరుతామని ఆయన స్పష్టం చేశారు. గతంలో చర్చల ద్వారా సమస్యలను పరిష్కరించాలని చూసినా, అవతలి పక్షం విననప్పుడు బలం ఉపయోగించి సంస్థానాలను విలీనం చేసిన సర్దార్ పటేల్ విధానాన్నే తమ ప్రభుత్వం అనుసరిస్తోందని, మనపై దాడి చేసే వారికి వారి భాషలోనే సమాధానం చెబుతామని హెచ్చరించారు. గతంలో ఉగ్రవాద దాడులు జరిగినప్పుడు సర్జికల్ స్ట్రైక్స్ ద్వారా బుద్ధి చెప్పామని, అలాగే ‘ఆపరేషన్ సింధూర్’ ద్వారా శత్రువులకు గట్టి సందేశం ఇచ్చామని పేర్కొంటూ, మానవత్వానికి శత్రువులైన వారికి సింధు నది నీటిని ఇచ్చే ప్రసక్తే లేదని, పాకిస్తాన్ వైఖరి మారనంత వరకు కఠినంగానే ఉంటామని స్పష్టం చేశారు.

విశ్వబంధుగా భారత్‌

గడిచిన 12 ఏళ్లలో భారతదేశం ప్రపంచానికి ఒక ఆపద్బాంధవుడిగా, విశ్వబంధువుగా నిలిచిందని రక్షణ మంత్రి అన్నారు. ‘వసుధైక కుటుంబకం’ అనే సందేశాన్ని కేవలం మాటల్లో కాకుండా చేతల్లో చూపిన దేశం భారతదేశం అని, కోవిడ్ సంక్షోభ సమయంలో ప్రపంచవ్యాప్తంగా అవసరమైన వ్యాక్సిన్లలో 60% మన దేశంలోనే తయారయ్యాయని, ‘వ్యాక్సిన్ మైత్రి’ ద్వారా 100కు పైగా దేశాలకు 30 కోట్లకు పైగా కోవిడ్ వ్యాక్సిన్లను పంపిణీ చేశామని చెప్పారు. భారతదేశం దగ్గర ప్రపంచాన్ని రక్షించే వ్యాక్సిన్ ఎంత ఉందో, శత్రువులను తుత్తునియలు చేసే ‘బ్రహ్మోస్’ మిసైల్ కూడా అంతకంటే శక్తివంతంగా ఉందని హెచ్చరించారు. ప్రధాని మోదీ పనితీరును, దేశం పట్ల ఆయనకున్న ప్రేమను వివరిస్తూ, 2022లో మోదీ మాతృమూర్తి స్వర్గస్తులైనప్పుడు, ఆ బాధాకరమైన రోజున కూడా ఆయన తన తల్లి అంత్యక్రియలు ముగించుకున్న వెంటనే దేశ సేవలో నిమగ్నమయ్యారని గుర్తు చేశారు. ముందే నిశ్చయమైన నేషనల్ గంగా కౌన్సిల్ సమావేశంలో పాల్గొనడమే కాకుండా, వందేభారత్ రైలును కూడా ప్రారంభించారని చెప్పారు. ఏ ఒక్క మంత్రి కూడా తన తల్లి మరణం కారణంగా అధికారిక కార్యక్రమాలను రద్దు చేసుకోవద్దని మోదీ కోరారని, “ప్రజల సేవ కోసమే నువ్వు వెళ్లావు, ప్రజల పనులే నీ ప్రథమ కర్తవ్యం కావాలి” అని వారి అమ్మ నేర్పిన సంస్కారమే మోదీని నడిపిస్తోందని శ్లాఘించారు. తన తల్లి చనిపోయిన రోజు సహా ఒక్క రోజు కూడా సెలవు తీసుకోని వ్యక్తి ఈ దేశాన్ని, మాతృభూమిని ఎంతగా ప్రేమిస్తున్నారో అర్థం చేసుకోవచ్చన్నారు. 

నక్సలిజం ఇక చరిత్ర‌‌

దశాబ్దాలుగా మన భద్రతా దళాల్లో, సామాన్య ప్రజల్లో రక్తపాతాన్ని సృష్టించిన నక్సలిజాన్ని మోదీ నాయకత్వంలో భారతదేశ గడ్డపై నుండి దాదాపు తుడిచిపెట్టేశామని రక్షణ మంత్రి సగర్వంగా ప్రకటించారు. గతంలో తుపాకీ శబ్దాలు మోగిన ప్రాంతాల్లో ఈరోజు స్కూల్ బెల్స్ మోగుతున్నాయని, రోడ్లు, అభివృద్ధి వేగంగా చేరుతున్నాయని చెప్పారు. దేశ ఆర్థిక వ్యవస్థను బలోపేతం చేస్తూ ‘వన్ నేషన్, వన్ మార్కెట్, వన్ టాక్స్’ విధానంతో జీఎస్టీని విజయవంతంగా అమలు చేశామని, దీనివల్ల ఈజ్ ఆఫ్ డూయింగ్ బిజినెస్ పెరిగిందని అన్నారు. శ్రామికుల సామాజిక భద్రత, ఆదాయం పెంచేందుకు నాలుగు లేబర్ కోడ్‌లను తెచ్చామని, అలాగే వలస పాలన నాటి పాత చట్టాల స్థానంలో దేశ పౌరుల హక్కులను వేగంగా కాపాడేలా కొత్త న్యాయ చట్టాలను తీసుకువచ్చామని తెలిపారు. జమ్మూ కాశ్మీర్‌లో ఆర్టికల్ 370ని ఎవరూ తొలగించలేరన్న కాంగ్రెస్ మాటలను పటాపంచలు చేస్తూ, తమ ప్రభుత్వం దానిని రద్దు చేసిందని, “ఒకే దేశంలో రెండు రాజ్యాంగాలు, ఇద్దరు ప్రధానులు, రెండు జెండాలు చెల్లవు” అన్న డాక్టర్ శ్యామాప్రసాద్ ముఖర్జీ కలని నిజం చేశామని చెప్పారు. గతంలో రాళ్లు రువ్వడం, ఉగ్రవాదంతో వార్తల్లో నిలిచిన కాశ్మీర్ ఈరోజు పర్యాటకం, పెట్టుబడులు, ఉపాధితో కళకళలాడుతోందని, లాల్ చౌక్‌లో త్రివర్ణ పతాకం ఎగురుతోందని, అక్కడ జన్మాష్టమి వేడుకలతో పాటు మొహర్రం ఊరేగింపులు కూడా శాంతియుతంగా జరుగుతున్నాయని, తాము కుల, మతాల ఆధారంగా వివక్ష చూపబోమని, ఇన్సాఫ్ (న్యాయం), మానవత్వాల రాజకీయమే చేస్తామని స్పష్టం చేశారు.

 భారత్ గడ్డపైనే తయారీ‌

2014కు ముందు దేశంలో నిరాశ నిండి ఉండేదని, విదేశీ పెట్టుబడులు పెట్టడానికి ఎవరూ ముందుకు రాలేదని, కానీ నేడు ప్రపంచ దేశాలన్నీ భారత్‌తో వాణిజ్య సంబంధాల కోసం పోటీ పడుతున్నాయని రక్షణ మంత్రి తెలిపారు. గత 12 ఏళ్లలో 38 దేశాలు భారత్‌తో కొత్త వాణిజ్య ఒప్పందాలు చేసుకున్నాయని పేర్కొంటూ, ‘మేక్ ఇన్ ఇండియా’ విజయాలను వివరించారు. భారతదేశానికి ఏటా 19 బిలియన్ల సెమీకండక్టర్ చిప్స్ అవసరమవుతాయని, గతంలో 1960లలో మరియు 2004-05లో కాంగ్రెస్ ప్రభుత్వం పర్మిషన్లు ఇవ్వకుండా తాత్సార్యం చేయడం వల్ల సదరు కంపెనీలు చైనాకు వెళ్లిపోయాయని, దేశం పెద్ద ఎత్తున ఉపాధిని కోల్పోయిందని విమర్శించారు. కానీ మోదీ రాగానే దేశీయ సెమీకండక్టర్ రంగాన్ని ప్రోత్సహించి, గత ఏడాది దేశంలోనే మొట్టమొదటి ‘మేడ్ ఇన్ ఇండియా’ సెమీకండక్టర్ చిప్‌ను తయారు చేసి చూపామని ప్రకటించారు. అలాగే ప్రపంచవ్యాప్తంగా అమ్ముడవుతున్న ఐఫోన్లలో 25% భారతదేశంలోనే తయారవుతున్నాయని వెల్లడించారు. ‘మేక్ ఇన్ ఇండియా’ ద్వారా సూది నుండి ఓడల వరకు, మొబైల్స్ నుండి మిసైల్స్ వరకు, డ్రోన్ల నుండి వ్యాక్సిన్ల వరకు అన్నీ భారత్ గడ్డపైనే తయారవుతున్నాయని, ఈ ఏడాది ఎగుమతుల లక్ష్యాన్ని 1 ట్రిలియన్ డాలర్లకు, రాబోయే ఐదేళ్లలో 2 ట్రిలియన్ డాలర్లకు పెంచడమే లక్ష్యంగా పెట్టుకున్నామని చెప్పారు. గతంలో కేవలం రూ.600 కోట్లు లేదా రూ.1000 కోట్లుగా ఉన్న రక్షణ రంగ ఎగుమతులు నేడు దాదాపు రూ.39,000 కోట్లకు చేరాయని, ప్రపంచంలోని 100కు పైగా దేశాలకు భారతదేశం రక్షణ పరికరాలను ఎగుమతి చేస్తోందని సగర్వంగా ప్రకటించారు.

గత ప్రభుత్వాల హయాంలో ధనికులు మరింత ధనికులుగా, పేదలు మరింత పేదలుగా మారారని, కానీ తమ అంత్యోదయ విధానం వల్ల గత 12 ఏళ్లలో 25 కోట్ల మంది దేశ ప్రజలను దారిద్ర రేఖకు ఎగువకు తీసుకువచ్చామని, అంతర్జాతీయ సంస్థల నివేదికలే దీనిని స్పష్టం చేస్తున్నాయని చెప్పారు. సమానత్వం విషయంలో ప్రపంచంలో భారత్ నేడు నాల్గవ స్థానానికి చేరిందని, రాబోయే 5 నుండి 8 ఏళ్లలో భారత్ ప్రపంచంలోనే నంబర్ వన్ స్థానానికి చేరుకుంటుందని నొక్కి చెప్పారు. గతంలో బ్యాంకు ఖాతా తెరవాలంటే సిఫార్సులు, సాక్ష్యాలు కావాల్సి వచ్చేదని, మోదీ వచ్చాక 56 కోట్లకు పైగా జన్ ధన్ ఖాతాలు తెరిపించారని, ఇప్పుడు బ్యాంకే ప్రజల ఇంటి వద్దకు వస్తోందని అన్నారు. దీనివల్ల ఎలాంటి దళారీ వ్యవస్థ లేకుండా దిల్లీ నుండి పంపిన సొమ్ము నేరుగా లబ్ధిదారుల ఖాతాల్లోకే చేరుతోందన్నారు. గ్రామీణ మహిళల ఆత్మగౌరవాన్ని కాపాడుతూ దేశంలో 12 కోట్లకు పైగా మరుగుదొడ్లను నిర్మించామని, 2019లో జల్ జీవన్ మిషన్ ప్రారంభించినప్పుడు కేవలం 17 శాతం ఇళ్లకు మాత్రమే సురక్షితమైన తాగునీరు అందుతుండగా, ఈరోజు ఆ సంఖ్య 82 శాతానికి చేరిందని, కోట్లాది మంది మహిళలకు నీటి కోసం మైళ్ల దూరం నడిచే కష్టం తప్పిందని పేర్కొన్నారు. పీఎం ఆవాస్ యోజన ద్వారా కోట్లాది ఇళ్లను మహిళల పేరిట రిజిస్ట్రేషన్ చేశామని, ఉజ్వల యోజన ద్వారా పొగ నుండి విముక్తి కల్పించామని, ఆయుష్మాన్ భారత్ ద్వారా రూ.5 లక్షల వరకు ఉచిత వైద్యం అందిస్తున్నామని వివరించారు. రాజులమని భావించే కాంగ్రెస్ నాయకులకు పేదరికం, గ్రామీణ బాధలు ఎప్పటికీ అర్థం కావని ఎద్దేవా చేశారు.

తెలంగాణ అభివృద్ధి కోసం‌‌

రాష్ట్రాల్లో ఏ పార్టీ అధికారంలో ఉన్నా తమ ప్రభుత్వం అభివృద్ధి విషయంలో ఎన్నడూ వివక్ష చూపలేదని, దేశ ప్రయోజనాలే తమకు ప్రథమ ప్రాధాన్యమని రాజ్‌నాథ్ సింగ్ స్పష్టం చేశారు. తెలంగాణకు మోదీ ప్రభుత్వం చేసిన కేటాయింపులను ఆయన గణాంకాలతో వివరిస్తూ, గతంలో ఉమ్మడి రాష్ట్రంలో రైల్వే బడ్జెట్ రూ.1000 కోట్ల కంటే తక్కువగా ఉండేదని, కానీ ఈరోజు కేవలం తెలంగాణ రైల్వే బడ్జెట్ కోసమే దాదాపు రూ.5,000 నుండి రూ.5,500 కోట్లు కేటాయించామని చెప్పారు. తెలంగాణలో రూ.32,000 కోట్ల విలువైన రైల్వే ప్రాజెక్టులు నడుస్తున్నాయని, ప్రస్తుతం 5 వందేభారత్ రైళ్లు, 6 అమృత్ భారత్ రైళ్లు విజయవంతంగా నడుస్తున్నాయని తెలిపారు. గత నెలలోనే ప్రధాని మోదీ తెలంగాణలో రూ.1700 కోట్ల వ్యయంతో పీఎం మిత్రా టెక్స్ టైల్ పార్క్ ను ప్రారంభించారని, ఇది తెలంగాణలో భారీగా ఉపాధి అవకాశాలను మెరుగుపరుస్తుందని ఆశాభావం వ్యక్తం చేశారు. మల్కాజ్‌గిరిలో ఇండియన్ ఆయిల్ కొత్త టెర్మినల్ ప్రారంభం ద్వారా తెలంగాణ ఇంధన అవసరాలు తీరనున్నాయని చెప్పారు. తమ ప్రభుత్వం ఎల్లప్పుడూ ప్రజా సేవకే అంకితమై ఉంటుందని, దేశ ప్రయోజనాలే పరమావధిగా పనిచేస్తుందని రాజ్‌నాథ్ సింగ్ స్పష్టం చేశారు. దేశాన్ని మరింత శక్తివంతంగా మార్చేందుకు, వికసిత భారత్ నిర్మాణంలో మోదీ నాయకత్వానికి, భారతీయ జనతా పార్టీకి తెలంగాణ ప్రజల, మేధావుల సంపూర్ణ ఆశీస్సులు, మద్దతు ఉండాలని కోరారు.

సమర్థ నాయకత్వం మన అదృష్టం: ఎన్. రాంచందర్ రావు‌

సర్జికల్ స్ట్రైక్స్, ఆపరేషన్ సిందూర్ వంటి సాహసోపేత చర్యలతో భారత రక్షణ సామర్థ్యాన్ని ప్రపంచ వేదికపై చాటిచెప్పిన ఘనత ప్రధాని నరేంద్ర మోదీ నాయకత్వంలోని కేంద్ర ప్రభుత్వానిదేనని బిజెపి తెలంగాణ రాష్ట్ర అధ్యక్షుడు ఎన్. రాంచందర్ రావు పేర్కొన్నారు. దేశ భద్రత విషయంలో రాజీపడని నాయకత్వం, నిర్ణయాత్మక పాలన వల్లే భారత్ నేడు మరింత సురక్షిత దేశంగా నిలిచిందని ఆయన అన్నారు. గత 12 ఏళ్లలో మోదీ ప్రభుత్వం దేశాన్ని ఆర్థిక, వ్యూహాత్మక, భద్రతా రంగాల్లో కొత్త శిఖరాలకు తీసుకెళ్లిందని, ప్రపంచంలోనే నాలుగో అతిపెద్ద ఆర్థిక వ్యవస్థగా భారత్ ఎదగడం ఆ దూరదృష్టి నాయకత్వానికి నిదర్శనమని ఆయన కొనియాడారు. మోదీ, రాజ్‌నాథ్ సింగ్ వంటి సమర్థవంతమైన నాయకత్వం లభించడం దేశ ప్రజల అదృష్టమని, వీరి దృఢమైన నిర్ణయాల వల్లే భారతదేశ రక్షణ సామర్థ్యం, జాతీయ భద్రత మరింత బలోపేతమయ్యాయని కొనియాడారు. సర్జికల్ స్ట్రైక్స్, ఆపరేషన్ సిందూర్ వంటి ధైర్యవంతమైన చర్యల ద్వారా భారత్ తన సంకల్పాన్ని, సాహసాన్ని ప్రపంచానికి చాటిచెప్పిందని, ఉగ్రవాదం సహా జాతీయ భద్రతకు ఎదురైన ప్రతి సవాల్‌కు మోదీ ప్రభుత్వం గట్టి సమాధానం ఇచ్చిందని స్పష్టం చేశారు. నేడు మోదీ నాయకత్వంలో భారత్ సురక్షితంగా, బలంగా ఉందనే పూర్తి విశ్వాసం దేశ ప్రజల్లో వ్యక్తమవుతోందని ఆయన పేర్కొన్నారు.

జాతీయ రక్షణలో మహిళా శక్తి పాత్రను ప్రస్తావిస్తూ, ‘ఆపరేషన్ సిందూర్’ మహిళల నేతృత్వంలోని ధైర్యసాహసాలకు గర్వకారణమైన ఉదాహరణగా నిలిచిందని రాంచందర్ రావు గుర్తుచేశారు. మోదీ నాయకత్వంలో మహిళలకు సాయుధ దళాల్లో మరిన్ని అవకాశాలు, ఉన్నత స్థానాలు లభిస్తున్నాయని, ఇది నారీ శక్తి వందన్ పట్ల కేంద్ర ప్రభుత్వ నిబద్ధతకు నిదర్శనమని పేర్కొన్నారు. గత 12 సంవత్సరాలుగా కేంద్ర ప్రభుత్వం ‘జన విశ్వాస్, వికాస్, జన్ కళ్యాణ్’ మంత్రంతో దేశాన్ని ముందుకు నడిపిస్తోందని, దీని ఫలితంగానే భారత్ ప్రపంచంలో నాలుగో అతిపెద్ద ఆర్థిక వ్యవస్థగా ఎదిగి, ‘వికసిత్ భారత్’ లక్ష్య సాధన దిశగా ఆత్మవిశ్వాసంతో దూసుకుపోతోందని అన్నారు. ప్రపంచ సంక్షోభాలు ఎదురైనా, భారత్ అభివృద్ధి సాధించేలా ప్రధాని నరేంద్ర మోదీ ధైర్యంగా అడుగులు వేశారని, అందుకే నిరంతరాయంగా అత్యధిక కాలం ఎన్నికైన ప్రధానమంత్రిగా ఆయన చరిత్ర సృష్టించారని కొనియాడారు. ప్రస్తుత పదవీకాలం పూర్తయ్యాక కూడా ప్రజల ఆశీర్వాదంతో 2029లో మోదీ మరోసారి ప్రధానమంత్రిగా ఎన్నికై, వికసిత్ భారత్ లక్ష్యాన్ని పరిపూర్ణంగా చేసే దిశగా పాలన అందిస్తారని ఆయన బలమైన విశ్వాసం వ్యక్తంచేశారు.

పెండింగ్ సమస్యలెన్నో పరిష్కారం: కిషన్ రెడ్డి‌‌

కేంద్రమంత్రి జి.కిషన్ రెడ్డి ప్రసంగిస్తూ.. “నరేంద్ర మోదీ ప్రభుత్వంలో గత 12 ఏళ్ల పాలనలో దేశంలో చాలా కాలంగా పెండింగ్‌లో ఉన్న అనేక కీలక సమస్యలను పరిష్కరించారు. దేశ ప్రయోజనాలను దృష్టిలో పెట్టుకుని పలు చట్టపరమైన, పరిపాలనా సంస్కరణలను అమలు చేశారు. ఆర్టికల్ 370 రద్దు, అయోధ్యలో రామాలయ నిర్మాణం, ట్రిపుల్ తలాక్ రద్దు, ఉగ్రవాద నిర్మూలనకు కఠిన చర్యలు వంటి ఎన్నో చారిత్రాత్మక నిర్ణయాలను మోదీ ప్రభుత్వ 12 సంవత్సరాల పాలనలో అమలు చేయడం జరిగింది. దేశ గౌరవం కోసం, దేశ అభివృద్ధి కోసం, ప్రజల సంక్షేమం కోసం ప్రధాని నరేంద్ర మోదీ నిరంతరం అంకితభావంతో పని చేస్తున్నారు. నరేంద్ర మోదీ ప్రధానమంత్రిగా బాధ్యతలు స్వీకరించినప్పుడు తాను “ప్రధానమంత్రి కాదు, ప్రధాన సేవకుడిని” అని చెప్పారు. గత 12 సంవత్సరాల పాలనలో ఆయన ఆ మాటలను చేతల్లో చూపించి నిరూపించారు. నీతి, నిజాయితీ, పారదర్శకతకు ప్రాధాన్యం ఇస్తూ, అవినీతి ఆరోపణలకు తావులేకుండా పరిపాలన అందిస్తున్న నాయకుడు ప్రధాని నరేంద్ర మోదీ. ప్రజల విశ్వాసాన్ని నిలబెట్టుకుంటూ, దేశాన్ని అభివృద్ధి పథంలో ముందుకు నడిపిస్తున్న నాయకత్వం నరేంద్ర మోదీదే.” అని అన్నారు.

బిజెపి జాతీయ ఉపాధ్యక్షురాలు, ఎంపీ డీకే అరుణ, బిజెపి శాసనమండలి పక్ష నాయకులు ఏవీఎన్ రెడ్డి, ఎంపీలు ఈటల రాజేందర్, రఘునందన్ రావు, ఎమ్మెల్యే రాకేష్ రెడ్డి, ఎమ్మెల్సీలు అంజిరెడ్డి, మల్క కొమురయ్య, బిజెపి రాష్ట్ర సంస్థాగత ప్రధాన కార్యదర్శి చంద్రశేఖర్ తివారీ, రాష్ట్ర ప్రధాన కార్యదర్శులు డా. ఎన్. గౌతం రావు, వీరేందర్ గౌడ్, ఇతర నాయకులతో పాటు, నగర ప్రముఖులు, మేధావులు, మాజీ సైనికులు పాల్గొని కార్యక్రమాన్ని జయప్రదం చేశారు.